2Ti 1 | WSK | STEP | Ani Paul, Jesus Kristus ko apostle, wore tam gawa imi bataguru ni Timothy kisisam. Ni den gilalong yawara te aninga kuriang yawara. Kaem Jesus Kristus te kariimet marak sokel yawara nungarukko balam, ale aninga balam den mu ko gilalong kari bagirikko ma aga balam. Nanga Ba Kaem, se nanga Biya Jesus Kristus ilak, nunga nongomang bataga, nunga saonga yawara, se nunga nongomang lila ni kisimon se te bagerko.

2 Timothy 1

Den gira

1 Ani Paul, Jesus Kristus ko apostle, wore tam gawa imi bataguru ni Timothy kisisam. Ni den gilalong yawara te aninga kuriang yawara. Kaem Jesus Kristus te kariimet marak sokel yawara nungarukko balam, ale aninga balam den mu ko gilalong kari bagirikko ma aga balam.

Nanga Ba Kaem, se nanga Biya Jesus Kristus ilak, nunga nongomang bataga, nunga saonga yawara, se nunga nongomang lila ni kisimon se te bagerko.

Timothy sokel ago se nguangara den gilalong balukko Paul maonam

3 Aninga angatak ari nongomang ningi nunguning te Kaem ko ura bitakasan iwitatala, ani Kaem ko ura betesam. Ale turom woremkalal aninga ngatangara te tom suen biya nika angamin tugusam, ale ni ko ko Kaem amilmil tusam. 4 Ani nika menenge yu kaparam wore ko aking ikia tasam, ale karkik nunguningkiri mu asele amilmilirikko.

5 Ani nika gemang ningi nunguning Kari Biya kote aniso mu ani ko ikiwasam. Nika nengetak imet Lois, se niam Eunice nuna giriman nongomang ningi nunguning karogo bagaman, se ani ikisam aitak ni nunga turan tala gemang ningi nunguning. ^{▼▼2 Tim 1:5-6 Timothy: Acts 16:1; 1 Tim 4:14.} 6 Umutang ko ani ka manorsam, ni kari bo tama ituguso se biyala buluk pagoso iwitata, ni Kaem ko munan sokel, tom ani agiting ni sipiling awete awurem se kisam, mu ninguru ura te bitarko. 7 Mu awuk, Kaem nu ana nguangara ko bur me nangaram, mena. Nu kota ko Bur nangaram, ana te sokel ago baga se, nainimi ko kua se, nangata nanga ikia, nanga nangamang diram la te bitarnakko nangaram. ^{▼▼2 Tim 1:7-8 Korang Bur sokel nangarso: Rom 8:15. Se Kristus ko den balnakko me nguanganakko: Rom 1:16; 2 Tim 2:3,9.}

8 Buta se ni nanga Kari Biya ko dugu duap baluko me dolerko, am sokel ago la baluko. Ale ani noko nup ko talipara kawam ningi bagasam wore mu ko betela me dolerko. Mena. Ni den gilalong yawara am apu sagerko. Se ikup kisimon agi mu am giko, ani gisam iwitatala. Bare Kaem sokel kisokko. 9 Nu anananga giam ale noko kariimet ko nanga balam. Bare kilek ningo aguwaya ana bitakasan mu ko me nanga giam. Mena. Bare nu kota ko ikia te se ko gomang bataga te anananga giam. ^{▼▼2 Tim 1:9 Kaem ko gomang bataga te anananga giam: Eph 2:8-9; Titus 3:4-5.} Girakala biya, ali imi me aratam la, Kaem Jesus Kristus te uwutata ana gomang nangaruk ale nanga giokko mu ko ikia beteram se anikaso. 10 Bare aitak nanga Saonga Kari Jesus Kristus tairam mu te Kaem ko ikia aniram mu wetang te anananga kausam. Kristus kuera ko sokel menawuram, ale ko den gilalong yawara te marak yawara pempem la te bagara ko mu nanga kausam. ^{▼▼2 Tim 1:10 Kristus kuera ko sokel menawuram: 1 Cor 15:55-57; Col 2:14.} 11 Se ani den gilalong yawara borta wonong wonong kariimet nunga kasuru kasuru namirikko Kaem apostle ko aga beteram se bagasam.

12 Umutang ko ani aitak ikup giwasam. Bare ani me ko dolawasam. Mu awuk, Kari ani ko angamang ningi nunguning aram umutang ani ninguru ko ikisam. Ale ani iwita ikisam, mel suen biya ani nu ko sinar taukko kuting te beterem, mu nu ko sinar tauk nama noko tairukko tom mu te. ^{▼▼2 Tim 1:12 Paul Kari Biya ko gomang ningi nunguning: Psalm 37:5-6.}

13 Den gilalong yawara ko ani ka manem mu diram la ilukuawurko, ale turan te kariimet nunga kasuruko. Ale nika gemang ningi nunguning Jesus Kristus ko aniso mu se, nainimi ko kuera ko munan nu ko balam, mu karogotala ilukuawurko. 14 Ale Korang Bur ana nangamang ningi bagoso wore ko sokel nangarso mu te, den nunguning Kaem ni ko sinar toko kiting te beteram mu ninguru ko sinar toko.

15 Ni ikisam, Asia sor te kari suen biya aga beteman ale naguman. Se nunga ningi Phygelus Hermogenes ilak mu agotala aga beteman.

16 Bare aninga angamang mu Kari Biya Onesiphorus ko gue suwan arungu gomang nungarukko. Mu awuk, Onesiphorus tom suen biya tai agarkikaso ale angamang sokel tuikaso. Nu ani imi te talipara ningi bagasam mu ani ago ko me dolakaso. Mena. 17 Tom nu Rome tairam mu nu aninga kupuwa agarkam, umutang agate taikaso ale sokel aisukaso. Se umutang ko aninga angamang tutera kam biya mu te Kari Biya nu gomang tuokko! Ni ko ikisam, nu giringila la Ephesus wonong te betela mel suen biya te aninga sangarukaso.

18